Parchemin, x mm. Souscription autographe de Rodrigue. Israhelitico namque populo legalibus cerimoniis obumbrato, et tabernaculo Silo ubi Deus habitauerat in hominibus ex filiorum Heli nequitia reprobato, in monte Syon domum orationis cunctis gentibus instituit in cuius templi dedicatione ad roboranda simplicium corda domini gloria in nebula patenter apparuit.
Et deo imperium qui premeditatus hoc fuerat in eternum permanere constituit. Vt autem accedente plenitudine temporis de terra orta est ueritas et mentita est sibi iudeorum iniquitas atque in Sponsi et Redemptoris sui thalamum ingressa est redempta plenitudo gentium. Profecto claruit quod sanctus spiritus per Malachie predixerat uaticinium: A solis ortu usque ad occasum magnum est nomem meum in gentibus et in omni loco sacrificatur et offertur nomini meo oblatio munda.
Repulsa igitur primum ut oportuit iudea perfidia, apostolice sonus predicationis ab orientali Syon in fines orbis exiens, totam sub occiduo repleuit Hispaniam, que fermiter ad dei cultum eruditissimis informata doctoribus, abiectis supersticionibus, extirpatis erroribus, nemine resistente, nonullis in pace quieuit temporibus.
Itaque annorum ferme cccc orum in hac calamitate labente curriculo, tandem dignatus clementissimus Pater suo misereri populo, inuictissimum principem Rudericum Campidoctorem obprobrii seruorum suorum suscitauit ultorem et christiane religionis propagatorem. Qui, post multiplices et eximias quas diuinitus assecutus est preliorum uictorias, diuiciarum gloria et hominum copia opulentissimam urbem cepit Ualentiam.
Necnon et innumerabili moabitarum et tocius Hispanie barbarorum exercitu superato, uelut in momento ultra quam credi potest sine sui detrimento, ipsam meschitam que apud agarenos domus oracionis habebatur Deo in ecclesiam dicauit et uenerabili Ieronimo presbitero, concordi et canonica acclamatione et electione per romani pontificis manus in episcopum consecrato, et specialis priuilegii libertate sublimato, prelibatam ecclesiam ex suis facultatibus tali dote ditauit:.
